SIUT UIMF – 2025 forumida: Ta’lim va “Sanoat 4.0” integratsiyasi – kon-metallurgiya sohasining yangi strategiyasi
Joriy yilning 28–29-oktabr kunlari Toshkentdagi “UzExpoCentre” majmuasida VII O‘zbekiston Xalqaro kon-metallurgiya forumi (UIMF – 2025) bo‘lib o‘tdi. Tadbirda Samarqand xalqaro texnologiya universiteti delegatsiyasi ilmiy ishlar va innovatsiyalar bo‘yicha prorektor, texnika fanlari doktori, professor Tulkun Samukov rahbarligida faol ishtirok etdi.

Mazkur nufuzli forum “Congresses of Central Asia” (CCA) va “ITECA Exhibition” kompaniyalari tomonidan Tog‘-kon sanoati va geologiya vazirligi, Savdo-sanoat palatasi hamda O‘zbekiston metallurgiya assotsiatsiyasi ko‘magida tashkil etildi.

Tadbir “Kelajak kon sanoati: resurslar va strategiyalar” mavzusida o‘tkazilib, unda 17 mamlakatdan 550 dan ortiq ishtirokchi va 46 nafar spikerlar qatnashdilar. Avstraliya, Germaniya, AQSh, Yaponiya, Fransiya, Shvetsiya va boshqa davlatlar vakillari sanoatning raqamli transformatsiyasi, ESG standartlari (Environment, Social, Governance), strategik minerallarni boshqarish, inson kapitalini rivojlantirish hamda “Sanoat 4.0” modeli kabi dolzarb yo‘nalishlarda o‘z tajribalarini almashdilar.
Forumda alohida e’tibor inson kapitalini rivojlantirish masalalariga qaratildi. Forumning markaziy sessiyalaridan biri — “Kon-metallurgiya kompleksida professional ta’limning kelajagi” muhokamasida xalqaro ta’lim standartlarini joriy etish mexanizmlari va sanoat bilan ta’lim o‘rtasidagi integratsiyani chuqurlashtirish masalalari muhokama qilindi.

Mazkur sessiyada SIUT ilmiy delegatsiyasi “Samarqand xalqaro texnologiya universitetida yuqori malakali muhandis kadrlarni tayyorlash uchun dual ta’lim tizimini joriy etish” mavzusida taqdimot bilan ishtirok etdi.
Professor T. Samukov o‘z chiqishida SIUT O‘zbekistonda to‘laqonli dual ta’lim tizimini joriy etgan ilk oliy ta’lim muassasalaridan biri ekanini alohida ta’kidladi.
“Bugungi kunda kon-metallurgiya kompleksining barqaror rivojlanishi ilm-fan va ta’limning ishlab chiqarish jarayonlariga chuqur integratsiyasiz tasavvur qilib bo‘lmaydi. SIUT o‘z missiyasi sifatida yangi avlod muhandislarini tayyorlashni belgilagan — ular respublika sanoatini raqamli va ‘yashil’ rivojlanish bosqichiga olib chiqadigan mutaxassislar bo‘lishi kerak,” — dedi professor Samukov.

Universitetda joriy etilgan dual ta’lim modeli talabalarga birinchi kursdanoq yetakchi sanoat korxonalarida amaliy tajriba orttirish imkonini beradi. Bu yondashuv nazariya va amaliyotni uyg‘unlashtirib, yosh mutaxassislarning raqobatbardoshligini oshiradi hamda ularni real ishlab chiqarish muhitida faol ishtirok etishga tayyorlaydi.
Bugungi kunda O‘zbekistonning konchilik va metallurgiya tarmoqlari mamlakat eksport tushumlarining qariyb 30 foizini shakllantirib, minglab ish o‘rinlarini ta’minlamoqda. Shu bilan birga, strategik minerallar kelajak energetikasi, yuqori texnologiyalar va “yashil iqtisodiyot” uchun muhim resursga aylanmoqda.
Shu ma’noda UIMF – 2025 forumi tarmoqning barqaror o‘sishi, raqamli transformatsiya va innovatsiyalar yo‘lida yangi strategiyalarni shakllantirish uchun muhim xalqaro maydonga aylandi.
SIUT delegatsiyasining faol ishtiroki esa ilm, ta’lim va sanoat o‘rtasidagi integratsiyani mustahkamlash yo‘lidagi navbatdagi muhim qadamlardan biri bo‘ldi. Forum doirasida universitet vakillari sanoatning yetakchi korxonalari bilan uchrashuvlar o‘tkazib, dual ta’lim tizimiga mos o‘quv dasturlarni ishlab chiqish va ishlab chiqarishning real ehtiyojlari bilan sinxronlash masalalarini muhokama qildilar.

Forum yakunida yana bir bor ta’kidlandiki, O‘zbekiston kon-metallurgiya kompleksining barqaror rivojlanishi ilm-fan, kasbiy ta’lim va muhandislik kompetensiyalarini rivojlantirishga yo‘naltirilgan investitsiyalarsiz mumkin emas.
Shu nuqtai nazardan, ta’limning roli bugungi kunda sohani modernizatsiya qilish va yangi texnologik bosqichga olib chiqishning eng muhim omili sifatida e’tirof etildi.
SIUT esa bu jarayonning faol ishtirokchisi sifatida ta’lim va sanoat integratsiyasini mamlakat innovatsion taraqqiyotining asosiy harakatlantiruvchi kuchiga aylantirish yo‘lida izchil faoliyat olib bormoqda.