Ilmiy izlanishdan sanoatgacha: SIUT professori xalqaro konferensiyada
Ilmiy izlanishlarning ahamiyati ko‘pincha ularning amaliyotga qanday tatbiq etilishi bilan belgilanadi. Tabiiy resurslardan samarali foydalanish va foydali qazilmalarni qayta ishlash texnologiyalarini takomillashtirishga qaratilgan tadqiqotlar ham shu jihatdan muhimdir.

8–9-oktabr kunlari Jizzax shahridagi Qozon (Volga bo‘yi) federal universiteti filialida “Zamonaviy jamiyatning ilmiy-texnik va ijtimoiy-madaniy muammolari” mavzusidagi II xalqaro ilmiy-amaliy konferensiya bo‘lib o‘tdi. Unda Samarqand xalqaro texnologiya universiteti professori, fan doktori Aziza Kuldasheva ham o‘z ilmiy tadqiqoti bilan ishtirok etdi.
Aziza Kuldasheva o‘z ma’ruzasida “Qo‘ytosh vollastonitini boyitishning samarali texnologiyasini ishlab chiqish va uning sanoatda qo‘llanilishini kengaytirish” mavzusini yoritdi. Tadqiqot vollastonit mineralini samarali boyitish va undan sanoatda foydalanish imkoniyatlarini kengaytirishga qaratilgani bilan ahamiyatlidir.
Konferensiya doirasidagi ilmiy muloqot va tajriba almashinuvi tadqiqotchilarga o‘z ishlanmalarini kengroq auditoriyaga taqdim etish imkonini berdi.

Zero, ilm-fanning eng katta yutug‘i — yangi bilimni kashf etish bilangina cheklanmay, uning hayotda qanday samara berishini ko‘rsata olishdir. SIUT professorining xalqaro konferensiyadagi ishtiroki ham ilmiy izlanishlar va amaliy taraqqiyot o‘rtasidagi ana shu muhim bog‘liqlikni namoyon etadi.