Skip to main content

SIUT – China Datang bilan strategik hamkorlik sari ilk akademik qadam

2025-yilning 15–16-may kunlari Samarqand xalqaro texnologiya universiteti Xitoyning yetakchi energetika kompaniyalaridan biri – China Datang Overseas Investment vakillari bilan muhim muzokaralarga mezbonlik qildi.

Uchrashuv davomida xalqaro ilmiy, ta’limiy va texnologik sohalardagi hamkorlik istiqbollari muhokama qilindi. Delegatsiyaga kompaniyaning Markaziy Osiyo bo‘yicha mintaqaviy direktori – janob Teng Yi Peng va “Datang Uzbekistan” innovatsion markazi rahbari – janob Cai Minghui boshchilik qildi.

datang 2

China Datang – Xitoyda elektr energiyasi ishlab chiqarish bo‘yicha yetakchi beshlikka kiruvchi kompaniya bo‘lib, O‘zbekistonda – davlatimiz Energetika vazirligi bilan hamkorlikda faoliyat yuritadi. 2024-yilda “China Datang” kompaniyasi tomonidan O‘zbekistonda “Ipak yo‘li energetikasi” nomli qo‘shma texnologik innovatsion ilmiy-tadqiqot markazi (R&D) tashkil etilgan va ushbu markaz doirasida potaxtimiz Toshkent hamda Xitoydagi Chengdu shaharlarida 50 nafar o‘zbekistonlik mutaxassis uchun maxsus malaka oshirish dasturlari o‘tkazilgan.

datang 5

SIUTga tashrifi davomida xitoylik mehmonlar universitetning ilmiy va ta’limiy salohiyati, akademik infratuzilmasi hamda muhandislik ta’limiga oid ustuvor yo‘nalishlari bilan yaqindan tanishdilar. Muzokaralar chog‘ida quyidagi masalalar muhokama qilindi:

    • China Datang ishlab chiqarish klasterlarida SIUT talabalari uchun amaliyot dasturlarini tashkil etish;
    • ikki tomonlama qo‘shma ta’lim dasturlarini yaratish;
    • texnik mutaxassislar uchun til va kommunikatsion ko‘nikmalarni rivojlantirish bo‘yicha hamkorlik;
    • xalqaro energetika loyihalarida SIUT talabalari ishtirokini ta’minlash;
    • muayyan yo‘nalishlar — “Issiqlik energetikasi” (CIEP), “Qayta tiklanuvchi energiya” (KITC), “Xalqaro logistika” va boshqa yo‘nalishlar bo‘yicha maqsadli stipendiyalar ajratish imkoniyatlari.

— “Xalqaro loyihalarning muvaffaqiyati, avvalo, yuqori malakali kadrlar tayyorlashga bog‘liq. Faqat chuqur bilim va amaliy ko‘nikmaga ega mutaxassislargina texnologik yutuqlarni hayotga tatbiq etishi va samarali natijalarga erishishi mumkin,” — dedi Cai Minghui, ta’limning global energetika sohasidagi strategik ahamiyatini alohida qayd etar ekan.

O‘z navbatida, janob Teng Yi Peng – SIUT bilan akademik hamkorlikni kengaytirish, talabalarni amaliyot orqali qo‘llab-quvvatlash hamda ularning kasbiy o‘sishiga ko‘maklashish borasidagi tayyorgarliklarini bildirdi.

Ma’lumot uchun: 2025-yilda Xitoy va O‘zbekiston o‘rtasidagi qo‘shma ilmiy-tadqiqot loyihalari qayta tiklanuvchi energetika va zamonaviy qishloq xo‘jaligi sohalariga yo‘naltiriladi. Umumiy qiymati 30 million yuanga teng 30 ta loyiha qo‘llab-quvvatlanadi. SIUT ushbu tashabbus doirasida ilmiy loyihalar taqdim etishga, professor-o‘qituvchilar almashinuvi va qo‘shma konferensiyalar orqali akademik hamkorlikni rivojlantirishga tayyorligini bildirdi.

5

CIEP talabalarining 2024-yil avgust–sentyabr oylarida Xitoyning Jilin shahridagi Shimoliy-Sharqiy Energetika Universitetida o‘tkazilgan talabalar yozgi oromgohi doirasida China Datang korporatsiyasining Jilin filialiga tashrifi

SIUT birinchi prorektori, professor Bobby Hall tashrifning strategik ahamiyatini alohida ta’kidladi:

“Biz ushbu hamkorlikni oddiy akademik almashinuv emas, balki ta’lim, ilm-fan va sanoat sohalarining mintaqalararo integratsiyasiga yo‘naltirilgan muhim strategik qadam sifatida baholaymiz.”

Uchrashuv yakunida tomonlar o‘zaro hamkorlikni yangi bosqichga olib chiqish niyatida ekanliklarini bildirdilar. Shu maqsadda, 2025-yil avgust oyida China Datang kompaniyasining O‘zbekistondagi yangi binosi ochilish marosimi doirasida hamkorlik to‘g‘risidagi anglashuv memorandumi imzolanishi rejalashtirilgan.